प्राप्त जानकारीअनुसार प्रधानमन्त्री देउवा सबै प्रदेश प्रमुखहरूलाई एउटै निर्णयबाट एकै पटक हटाउने पक्षमा छन् । तर यादवले डा. झालाई पदमुक्त गराउन दिन होइन घण्टा र मिनेटका हिसाबले प्रतीक्षा गरिरहेका छन् ।

डा. झालाई पदमुक्त गरेर उक्त स्थानमा आफ्ना भाञ्जा चन्दन कौशिकलाई नियुक्त गराउने प्रयासमा काङ्ग्रेसका मनोनित उपसभापति विमलेन्द्र निधिबाट भइरहेको जानकारी प्राप्त भएको छ । कौशिकलाई निधिले आफू सत्तामा रहँदा नेपाल स्काउटको अध्यक्ष बनाइदिएका थिए । अहिले भने भाञ्जालाई प्रदेश प्रमुखको कुर्सीमा बसेको हेर्ने रहर निधिले गरेका छन् ।

उता यादवले चाहिँ कुनै मुसलमानलाई प्रदेश प्रमुख बनाएर विजय यादवलाई मुख्यमन्त्री चयन गर्ने सोच बनाएका छन् । हालका मूख्यमन्त्री लालबाबुको कामबाट यादव असन्तुष्ट रहेको र, उनको स्थानमा विजय यादवलाई नियुक्त गराउने तयारी भइरहेको बुझिएको छ । तर विजय यादवको थर यादव हुनुबाहेक अर्को कुन योग्यता भएर उनलाई मूख्यमन्त्री बनाउन खोजिएको हो, सो स्पष्ट हुन सकेको छैन ।