मधेस प्रदेश सभा किन स्थगित गरियो वार्षिकोत्सव समारोह ?

मधेशपाटी अनलाइन     २०७८ माघ २२, शनिबार ०१:५७ बजे मा प्रकासित


जनकपुरधाम । हावाहुरी तीव्रका कारण मधेसको प्रदेश सभाको वार्षिकोत्सव समारोहसमेत स्थगित भएको छ ।

हावाहुरीले त्रिपाल र मञ्चमासमेत क्षति पुर्‍याएको थियो । वार्षिकोत्सव समारोहका लागि जनकपुरस्थित प्रदेश सभा परिसरमा तयार पारिएको पन्डाल र टेन्ट उडाएपछि कार्यक्रम अन्तिम समयमा स्थगित गरिएको सभामुखका प्रेस सल्लाहकार प्रभाकर सिंहले जानकारी दिए ।

शुक्रबार बिहानैदेखि चलिरहेको हावाहुरीले वार्षिकोत्सवका लागि तयार गरेको पन्डालमा क्षति भएपछि कार्यक्रम स्थगित गरिएको प्रदेश सभा संसद सचिवालयले जनाएको छ । प्रतिकुल मौसमका कारण चौथो वार्षिकोत्सव कार्यक्रम स्थगित गरिएको प्रदेश संसद सचिवालयले अतिथि र सांसदहरूलाई एसएमएस गरेर सन्देश पठाएको छ ।

सचिवालयले पठाएको सन्देशमा मौसम प्रतिकुलताका कारण वार्षिकोत्सव स्थगित गरिएको र माघ २३ गते प्रदेश सभाको बैठक आह्वान गरिएको छ ।

हावाहुरीका कारण सांसदको पनि सहभागिता कम हुने भएकाले कार्यक्रम स्थगित भएको संसद्‍ सचिवालयका कर्मचारीले बताए । प्रदेश सभा सचिवालय शुक्रबार चार वर्ष पूरा भई पाँचौं वर्षमा प्रवेश गरेको छ ।

मधेस प्रदेशमा बिहीबार रातिदेखि वर्षासँगै तीव्र गतिमा हावाहुरी चल्दैछ । हावाहुरीका कारण यस प्रदेशमा तीन जनाको मृत्यू समेत भएको छ । धनुषामा दुई विद्यार्थी र रौतहटमा एक महिलाको मृत्यू भएको प्रहरीले जनाएको छ ।

प्रतिक्रिया





Top