सिरहा । सिरहाको कर्जन्हा नगरपालिका ६ बेतहा टोलकी दुई बालिका लिएर एक महिला सम्पर्कविहीन बनेकी छन् ।
सामाजिक अभियन्ता सरोज रायका अनुसार बेतहा टोलकी १६ वर्षीय रेशमा पासवान र १३ वर्षीया वर्षा पासवानलाई लिएर रवीना खातुन बेपत्ता भएकी हुन् ।
बालिका बेपत्ता बनाएकी ती महिलाको ठेगाना भने कसैलाई थाहा छैन । एक वर्ष अगाडिदेखि उनी बेतहामै बस्दै आएकी थिइन् । आफू समस्यामा परेको भनेपछि गाउँलेले उनलाई आश्रय दिएको बताइएको छ ।
स्थानीयका अनुसार उनी बेलाबेला केही दिनका लागि बाहिर गएइरहे पनि पुनः फर्केर बेतहामै आउँथिन् । चैत १ मा उनी दुई बालिका लिएर सम्पर्कविहीन भएकोले खोजीका लागि अनुरोध गर्दै अभियन्ता रायले सामाजिक सञ्जालमा महिला र हराएका बालिकाको तस्बिर पोष्ट गरेका छन् ।
उनले भारतको जयनगर पुग्न माडर नाका प्रयोग गर्न सक्नेतर्फ सचेत गराउँदै कसैले भेटे सूचना दिन अपिल गरेका हुन् ।
सिरहाका प्रहरी प्रवक्ता डीएसपी सुवास बुढाथोकीले घाँस काट्न गएकी दुई बालिका घर नफर्केको सूचना पाएको जानकारी दिए । महिलाले बालिकालाई बेपत्ता पारेको कुरा थाहा नभएको र बेपत्ता बालिकाको खोजी भइरहेको उनको भनाइ छ ।
प्रतिक्रिया