जनमत पार्टीले हुलाकी राजमार्ग क्षेत्रमा रोजगारी खोज्दै

मधेशपाटी अनलाइन     २०८० मंसिर ७, बिहीबार १०:३२ बजे मा प्रकासित


जनकपुरधाम । हुलाकी राजमार्ग क्षेत्रमा रोजगारी सिर्जना गर्ने विषयमा जनमत पार्टीले अध्ययन सुरु गरेको छ ।

हुलाकी राजमार्गलाई आधार बनाएर रोजगारी सिर्जना गर्ने विषयमा जनमतले राष्ट्रिय सचिव बीपी साहको नेतृत्वमा टोली नै खटाएका छन् । अध्ययनमा मधेश प्रदेश नीति आयोगका सदस्य डा. सोहन प्रसाद साहले सहजीकरण गरिरहेका छन् ।

२०७९ मंरिसरको आमचुनावमा कृषि र रोजगारीलाई मुख्य एजेण्डा बनाएको जनमतले १० लाख रोजगारी सिर्जना गर्ने घोषणा गरेको थियो । कछुवाको गतिमै निर्माण भए पनि सम्पन्नताको अन्तिम चरणमा रहेको हुलाकी राजमार्ग अन्तर्गत पहिलो चरणमा मधेश प्रदेशका आठवटै जिल्लामा हुलाकी राजमार्ग खण्डमा पर्ने स्थानीय जनप्रतिनिधि, बुद्धिजीवि र सर्वसाधारणको सुझाव संकलन गरिएको सचिव साहले बताए ।

जनमतले मंगलबार महोत्तरीको बखडी बजारबाट अध्ययन सुरु गरेको छ । हुलाकी राजमार्गमा के–कस्ता योजना, परियोजना सञ्चालन वा काम गरे रोजगारी सिर्जना हुन्छ भन्ने प्रश्न जनमतको टोलीले स्थानीय बासिन्दासँग गरेको छ ।

कार्यक्रममा जलेश्वर नगरपालिकाका मेयर सुरेश साह सोनारले हुलाकी राजमार्गलाई केन्द्र सरकारले उपेक्षा गरेको भन्दै आफ्नो पालिकामा हुलाकी राजमार्ग खण्डमा रोजगारीका लागि सहजीकरण गर्ने बताए । उनले केन्द्र र प्रदेश सरकारबाट ठोस योजना ल्याउन जनमत पार्टीलाई सुझावसमेत दिए ।

एकडारा गाउँपालिका अध्यक्ष दीपनारायण मण्डलले हुलाकी राजमार्गलाई व्यवस्थित गरिए आफ्नै पालिकामा हजारौंले रोजगारी पाउने बताए । हुलाकी राजमार्ग खण्डमा कृषि बजार र कोल्ड स्टोर स्थापना गर्न सके रोजगारी सिर्जना हुने सुझाव उनको थियो ।

जनमत पार्टीका सचिव साहले पार्टीले चुनावअघि जनतासँग गरेको प्रतिवद्धता पूरा गर्ने काममा लागेको बताए । ‘हामीले कुनै पनि सरकार आफ्नो अनुकुल चलाउन सक्ने मत पाएका छैनौं । त्यसकारण रोजगारीका लागि चाहेको जस्तो काम गर्न ढिलाइ भएको छ । तर, पार्टीले रोजगारी सृजनाका लागि हरसम्भव प्रयास गरिरहेको छ’, उनले भने ।

अध्ययनपछि पार्टीले निर्णय गरेर थप प्रक्रिया अगाडि बढाउने उनले बताए । सचिव साहले भने, ‘यसका लागि स्थानीय जनप्रतिनिधिदेखि अन्य पार्टीका नेता कार्यकर्ताहरुले पनि जनमत पार्टीलाई सहयोग गर्नुपर्ने छ ।’

प्रतिक्रिया





Top